“Müdafiə olunmaqla, “Borussiya”dan xal almaq utopiyadı”

“Boynuma alıram ki, sabahkı heyəti artıq müəyyənləşdirmişəm. Lakin strateji baxımdan bunu açıqlaya bilmərəm”. Futbolxeber.az-ın Dortmunda ezam olunmuş əməkdaşının verdiyi məlumata görə, bu sözləri “Qəbələ”nin baş məşqçisi Roman Qriqorçuk deyib.

Ukraynalı mütəxəssis Bakıda het-trik edən Obemeyanqdan söz açıb: “Obameyanq hazırda əla formadadı. O, unikal idmançıdı. Hazırki durumda o, idman elmi üçün öyrəniləsi fenomendi. Obemeyanq çox ciddi fiqurdu. Ona qarşı təbii ki, hazırlıq görəcəyik. Çətin olsa da, istəyimizin alınacağına inanırıq”.

Qriqorçuk qeyd edib ki, “Borussiya”ya qarşı müdafiə olunmaqla nəticə qazanmaq mümkün deyil: “Sabahkı matçda uğur qazanmaq üçün ilk növbədə rəqibi neytrallaşdırmalıyıq. Burada müdafiəyə yox, hücuma daha çox önəm verəcəyik. Müdafiə olunmaqla, “Borussiya”dan xal almaq utopiyadı”.