“Qəbələ”nin müdafiəçisi: “Borussiya” tək Mxitaryandan ibarət deyil”

“Qəbələ”nin müdafiəçisi Vojislav Stankoviç Futbolxeber.az-ın Almaniyaya ezam olunmuş əməkdaşına müsahibə verib.

- Sabah “Qəbələ” Avroliqanın qrup mərhələsi çərçivəsində “Borussiya” ilə qarşılaşacaq. Qarşıdakı matçla bağlı nə deyə bilərsən?

- Bizi çox çətin oyun gözləyir. “Borussiya” güclü komandadır. Üstəlik, hazırda çox yaxşı formadadır. Əlimizdən gələni edəcəyik ki, səfərdən uğurlu nəticə ilə qayıda.

- “Borussiya”nın son oyunlarda çox qol vurması “Qəbələ”ni narahat edir?

- Biz bura yaxşı oyun sərgiləmək üçün gəlmişik. Komandada istək var. Bütün komandamız işinə peşəkar cəhətdən yanaşır. “Borussiya”nın çox qol vurmasını özümüz üçün dərd etmirik.

- Əvvəlki matçdan fərqli olaraq, Henrik Mxitaryan bu dəfə meydana çıxacaq...

- “Borussiya” tək Mxitaryandan ibarət deyil. Dortmund klubunun heyətində yaxşı futbolçular var. Bu baxımdan Obemeyanq, Roys və digərlərinin adını çəkmək olar. Onları dayandırmaq üçün maksimum gücümüzü sərf edəcəyik.

- Sabahkı matçda Stankoviç müdafiənin mərkəzində kiminlə oynayacaq: Rafael Santosla, yoxsa Vitali Vernidubla?

- Bilmirəm. Buna baş məşqçi qərar verəcək.

- Yaxşı, onda sualı belə qoyaq: onlardan hansı ilə oynamaq sənin üçün daha rahatdı?

- Fərq etmir. Hər ikisi işinin peşəkarıdı.

- Bakıdakı matçda 3 qol vuran Obemeyanqın qarşısını kəsmək üçün xüsus planınız var?

- Həqiqətən də o çox yaxşı formadadı. Obemeyanq Avropada hazırda ən yaxşılardan biridi. Onu bağlamaq çətın olacaq. Lakin əlimizdən gələni edəcəyik ki, bu dəfə Obemeyanq istədiyi kimi oynamasın.

- Bəs, 60 min azarkeşin qarşısında oynamaq səni narahat edir?

- Bu baxımdan problem olmayacaq. Çünki daha əvvəl “Partizan”da çıxış edəndə stadionda dəfələrlə anşlaq görmüşəm. Bu, “Qəbələ” üçün də stimul ola bilər. Bu qədər azarkeşin qarşısında oynamaq hər bir futbolçu üçün motivasiyadı.

- Dortmunda hansı nəticə “Qəbələ” üçün sərfəlidi?

- Biz hər oyuna yalnız qələbə üçün çıxırıq. Rəqib “Borussiya” olsa belə, məğlubiyyəti əvvəldən qəbul etmirik. Real yanaşsaq, burada qeydə alınacaq heç-heçə də pis nəticə olmayacaq.