“İnter Arena”da qalmaqal: futbolçu yumruq atdı, azarkeş həbs olundu

Premyer Liqanın II turu çərçivəsində keçirilən “İnter” - “Neftçi” (1:0) oyunundan sonra qalmaqal yaşanıb. Futbolxeber.az-ın məlumatına görə, “Neftçi”nin futbolçuları hakimin final fitindən sonra azarkeşlərə tərəf gedərək, onlara dəstəklərinə görə minnətdarlıq etmək istəyiblər. Bu isə məğlubiyyətdən narazı olan fanatları özündən çıxarıb. Hətta fanatlardan biri (adı Nurlandır) meydana düşərək, Rahil Məmmədov və kapitan Araz Abdullayevə sərt şəkildə etiraz edib. Bu zaman onların yanında Məqsəd İsayev və Erik Ramos olub. Qarışıqlıq zamanı “Neftçi”nin futbolçularından biri (böyük ehtimalla Rahil Məmmədov) meydana daxil olan azarkeşi yumruqla vurub. “Neftçi”nin sabiq kapitanı Mirhüseyn Seyidov da özünü qalmaqal yerinə yetirib. Seyidov və “Neftçi” nümayəndələrinin müdaxiləsindən sonra insident yatırılıb. Polis isə meydana daxil olan azarkeşi həbs edib.