Elvin Məmmədov: “Qələbə qazanmaq üçün hər şeyi etdik”

"Bu gün meydana qələbə üçün çıxmışdıq, ancaq alınmadı. İnşallah, cavab matçına daha hazırlıqlı gedərik və vətənə qalibiyyətlə qayıdarıq". Futbolxeber.az-ın məlumatına görə, bu sözləri "Qarabağ"ın futbolçusu Elvin Məmmədov deyib.

Təcrübəli futbolçu Çempionlar Liqasının II təsnifat mərhələsində "Rudar"la qolsuz bərabərliklə nəticələnən görüşlə bağlı fikirlərini bölüşüb.

Məmmədov bildirib ki, rəqibin seçdiyi taktika "Qarabağ"ın qol vurmasını əngəlləyib: "Əslində yaxşı oynadıq, qələbə qazanmaq üçün hər şeyi etdik. Sadəcə, rəqib böyük qüvvə ilə müdafiədə oturmuşdu, bütün diqqətini qol buraxmamağa yönəltmişdi. Qol çatışmadı. Rəqib bizi yaxşı təhlil etmişdi. Həm də oynaya bilən komandadı. Biz də onları analiz etmişdik. Onsuz da, Çempionlar Liqasında zəif komanda olmur. Burda öz ölkələrinin çempionları çıxış edirlər. Buna görə də, oyun oyun asan keçmədi".

Elvin cavab matçında da "Rudar"ın eyni taktika ilə oynayacağından ehtiyatlanır: "Futbolda hər şey mümkündü. Birinci oyun həmişə çətin keçir. Bu nəticə hələ heç nə demək deyil. Biz kollektiv olaraq, gücümüzə inanırıq. "Qarabağ" özünü sübut etmiş komandadı. İnşallah, səfərdə qələbə qazanıb, mərhələ adlayan tərəf biz olarıq. O ki qaldı "Rudar"ın cavab matçında necə oynayacağına, bunu heç kim indidən deyə bilməz. Ola bilsin, onlar öz meydanlarında da müdafiə futbolu göstərsinlər. Əsas odu ki, biz öz oyunumuzu göstərək".

Mənbə: apasport.az