“Rudar”la oyunun hakimi 8 il əvvəl “Qarabağ”ın futbolçusunu meydandan qovub

Çempionlar Liqasının II təsnifat mərhələsinin ilk oyunu çərçivəsində keçiriləcək "Qarabağ" - "Rudar" matçını rumıniyalı Sebastyan Koltesku idarə edəcək. Futbolxeber.az-ın məlumatına görə, 38 yaşlı referi artıq 9 ildir ki FİFA hakimi statusunu daşıyır. Lakin 9 il əzində Koltesku avrokuboklarda cəmi 6 oyun idarə edib.

Onun yolu klublarımızla kəsişməsə də, 8 il əvvəl 21 yaşadək futbolçulardan ibarət yığmamızın oyununu idarə edib. Söhbət 2007-ci ilin 11 sentyabrında seçmə mərhələ çərçivəsində Xorvatiyaya qarşı baş tutan görüşdən gedir. Həmin matç xorvatların 3:2 hesablı qələbəsi ilə tamamlanıb. O oyunda U-21-in həmin vaxtkı baş məşqçisi Şakir Qəribovun meydana start heyətində buraxdığı futbolçular arasında hazırda “Qarabağ”ın formasını geyən Namiq Yusifov da olub. 14 nömrəli forma ilə meydana çıxan Yusifov 67 və 70-ci dəqiqələrdə sarı vərəqə almaqla meydandan qovulub.  Maraq üçün qeyd edək ki, həmin oyunda millimizin hər iki qolunu Asif Məmmədov vurub. Ruslan Abışov isə avtoqol müəllifi olub.