Əfran İsmayılov: "Rayon komandalarından təklif olsa da, "Bakı"nı seçdim"

"Qarabağ"ın sabiq üzvü, "Bakı"nın yeni transferi Əfran İsmayılov Futbolxeber.az saytına müsahibə verib.

- Əfran, "Qarabağ"dan artıq ayrılmısan?

- Hə, "Qarabağ"dan artıq tam ayrılmışam. Azad agent kimi komandanı tərk etdim. "Qarabağ"dakıların hamısı ilə yaxşı münasibətim var. Halallaşıb, komandadan getdim.

- Yəqin ki, yeni klubun da "Bakı" olacaq?

- "Bakı"ya keçdiyimi söyləmək olar. Artıq danışıb, razılaşmışıq. Keçidim demək olar ki, həll olunub. Bircə müqaviləyə imza atmaq qalıb.

- "Bakı"nı seçməyinə səbəb nə oldu?

- "Bakı"nın şəraitini hər kəsə bəllidir. Burada uğur qazanmaq üçün hər şey var. Bu komandaya keçdiyim üçün çox sevinirəm. İrəli sürülən şərtlər məni tam qane edir.

- Yəqin ki, digər klublardan da təkliflər var idi?

- Xidmətimdə maraqlı olan komanda təkcə "Bakı" deyildi. Digər komandalar da mənimlə maraqlanırdı. Amma ad çəkməyəcəyəm. Çünki artıq seçimimi etmişəm.

- Niyə həmin komandaları yox, məhz "Bakı"nı seçdin?

- Təklif aldığım digər klublar rayon komandaları idi və buna görə də təkliflərdən imtina etdim. Bakıdan kənarda oynamaq istəmirəm.

- Amma "Bakı" yeni mövsümdə avrokuboklarda iştirak etməyəcək.

- Orası elədir. Hazırda istirahətə ehtiyacım var. Bir qədər dincəldikdən sonra yeni mövsümün hazırlığına başlayacağam. İnanıram ki, "Bakı"da hər şey mənim üçün yaxşı olacaq. Komanda ilə birgə uğur qazanacağam".