“Hammarbü” “şok”da: Nurlan Novruzov Türkiyə yolunda

Azərbaycan Premyer Liqasında 2014/15 mövsümünün bombardiri olan Nurlan Novruzov özünə yeni komanda tapıb. Futbolxeber.az-ın apasport.az-a istinadən verdiyi məlumata görə, 22 yaşlı hücumçu karyerasını Türkiyədə davam etdirə bilər.

“Bakı”nın heyətində ötən mövsüm 15 qol vuran Novruzov ölkə daxilində heç kimə lazım olmadığını başa düşüb, xaricə üz tutub. Belə ki, milli komandamızın baş məşqçisi Robert Prosineçkidən sonra yerli klublar da onun xidmətinə ehtiyac duymayıblar.

Mövsümün sonlarına yaxın “Hammarbü”dən dəm vuran Nurlan, görünür, həmin komandanın İsveçin ən köklü klublarından biri olduğunu unudub. Bu uydurma hekayənin isə sonu məlum idi. Maraqlıdı ki, “Hammarbü” rəsmiləri onu tanımadıqlarını bildirsələr də, Nurlan israrla İsveçə gedəcəyini deyirdi. Ancaq deyəsən, hava limanında “yanlış təyyarəyə minib”, Türkiyəyə yollanıb.

Məlum məsələdi ki, Nurlan Novruzovu Türkiyə Superliqasının yaxınına belə buraxmazlar. O da bunu yaxşı dərk etdiyi üçün birinci liqada çıxış edən “Elazığspor”la anlaşıb. Bəli, doğru oxudunuz, Azərbaycanın ən yaxşı hücumçusu olduğunu iddia edən və bunu Prosineçkiyə də göstərəcəyini deyən futbolçu heç Azərbaycan Premyer Liqası səviyyəsində olmayan liqada oynamaq qərarına gəlib.

Nurlan “Elazığspor”la anlaşsa da, bu keçid baş tutmaya bilər. Çünki onun “Bakı” ilə müqavilə müddəti davam edir. “Zolaqlılar” isə “möhtəşəm” Türkiyə karyerasına başlamaq üçün ondan 40 min dollar tələb edir. Əks təqdirdə, Nurlanın xəyalları puç olacaq, “usta qolçuluğunu” türkiyəlilərə nümayiş etdirə bilməyəcək.

Qeyd edək ki, geridə qalan mövsümdə Cavid İmamverdiyev icarə əsasında “Elazığspor”da çıxış etmişdi. Lakin Türkiyə klubunda yaranmış ciddi maliyyə problemi müqavilə ilə “Neftçi”yə məxsus olan Cavidin vaxtından tez ölkəyə dönməsinə səbəb olmuşdu.