“Qarabağ” Avstriyada hazırlığa başlayır: hələ ki yarımçıq heyətlə

“Qarabağ” 2015-2016 mövsümünün hazırlığına start verib. Futbolxeber.az-ın məlumatına görə, Ağdam klubu Avstriyaya yollanıb. Çempionumuz Avstriya-Almanya sərhədində, Tirol şəhərinə yaxın Kössen qəsəbəsində məskunlaşıb. 21 günlük təlim-məşq toplanışı keçirməyi planlaşdıran “Qarabağ” dünən Bakı - İstabul - Münhen  reysiylə günorta saaatlarında səfərə çıxıb.

Ağdam klubu təlim-məşq toplanışına tam heyətlə gəlməyib. Belə ki, əsas və U-21 millisində olan futbolçular ötən mövsümü gec qapadığından komandaya iyunun 23-də qoşulacaqlar.

Dani Kuintana da Münhendə “Qarabağ”a qoşulub. Digər legionerlər isə bu gün və sabah komandanın düşərgəsində olacaqlar. Uzun müddətdir zədəli olan Çumbinyonun isə iyunun 30-da təlim-məşq toplanışına qoşulacağı gözlənilir.

“Qarabağ” Avstriyada təlim-məşq toplanışı müddətində 3 və ya 4 yoxlama oyunu keçirəcək. Qarşılaşmalar iyunun 30-u, iyulun 3, 7 və 8-də olması planlaşdırılır.

Bu günə komandanın tək məşqi var. Ağdam klubu yerli vaxtla 18:00-da (Azərbaycan vaxtıyla 21:00) günün yeganə çalışmasına çıxacaq.