“Rəvan” Lənkəranda məşqə çıxdı

Premyer Liqanın sonuncu - 32-ci turu çərçivəsində bu gün "Xəzər Lənkəran”la üz-üzə gələcək "Rəvan” bu oyuna hazırlığı başa vurub. Futbolxeber.az-ın məlumatına görə, "Rəvan" dünən Lənkəranda axşam saatlarında son məşqini keçirib. Uzun yol yorğunluğunu təxminən 3-4 saatlıq istirahətlə çıxardıqdan sonra Lənkəran şəhər mərkəzi stadionuna yollanan "Rəvan" həm də cari mövsümün son məşqinə çıxıb. Saat 19:30-da başlayan məşq təxminən saat yarım çəkdi. Futbolçuların isinmə hərəkətləri ilə start götürən hazırlıqda toplu çalışmalara daha böyük diqqət ayrıldı. Ardından "kvadratlar”la dar sahədə topu özündə saxlamaq qabiliyyətini nümayiş etdirən futbolçular məşqin sonunda qapıya zərbələr üzərində də işlədi.