Draqan Çeran: “Elə düşünməliyik ki, sanki “Qarabağ”la oyun həyatımızdakı son matçdı”

“Sabahkı oyun bizim Avropaya yollanmaq üçün son şansımızdır. İlk dəqiqələrdən bütün gücümüzü meydanda qoymalıyıq. Elə düşünməliyik ki, sanki bu, həyatımızdakı son oyundur”. Futbolxeber.az saytına müsahibəsində bu sözləri “Simurq”un hücumçusu Draqan Çeran deyib.

Sabah ölkə kubokunun yarımfinal mərhələsinin cavab oyunu çərçivəsində “Qarabağ”a qarşı keçirəcəkləri oyun haqda danışan serbiyalı forvard azarkeşlərin dəstəyinə ehtiyac duyduqlarını bildirib: “İlk oyunda minimal hesabla uduzmuşuq. Bu dəfə evdə oynayırıq. Azarkeşlərimizin dəstəyinə ehtiyac duyuruq. Hamımız birgə bu oyunda qələbə qazanmalı və finala yüksəlməliyik. Əvvəlki 2 oyunda “Qarabağ”a uduzduq. Həm kubokda, həm də çempionatda. İndi isə dəyişikliklər etməliyik. Bu qələbəyə çox böyük ehtiyac duyuruq. Özümüz, klubun adı, azarkeşlərimiz, Zaqatala üçün oynamalıyıq”.