“Neftçi” uduzubsa, tək Stamenkoviç yox, hamımız günahkarıq”

“Hər şey qabaqdadır. “Qəbələ” ilə oyun arxada qaldı. İndi növbəti oyunlara hazırlaşacağıq”. Futbolxeber.az saytına müsahibəsində bu sözləri “Neftçi”nin müdafiəçisi Elvin Yunuszadə deyib.

“Neftçi”nin vitse-kapitanı Premyer Liqanın 30-cu turu çərçivəsində “Qəbələ”yə uduzduqları oyunda baş məşqçi Arif Əsədovun start heyətində qapıda son görüşlərdə olduğu kimi Aqil Məmmədova deyil, Saşa Stamenkovçə şans verməsinə də münasibət bildirib “Aqilin komandada yeri başqadı. O cümlədən də Saşanın. Məğlubiyyətə görə qapıçını günahlandırmaq olmaz. Hansı birimizin səhvi olmur ki? Uduzmuşuqsa, tək Stamenkoviç yox, bunda hamımız günahkarıq. Qapıçı dəyikliyi baş məşqçinin qərarı idi. Qapıda ona şans verirsə, deməli, nəsə bildiyi var”.

Yunuszadə “Qəbələ” ilə oyunun ikinci hissəsində meydanda tez-tez baş verən gənrginliklərə də münasibət bildirib: “Hər iki komanda istəkli idi. Ciddi problem yoxdu. Meydanda olanlar elə orada da qaldı”.

“Düşünmək olar ki, “Neftçi”nin fikri kubokda olduğu üçün “Qəbələ”yə uduzdu” sualını Elvin Yunuszadə belə cavablandırıb: “Deməzdim ki, fikrimiz tək kubokdadı. Çempionat da bizim üçün vacibdi. Hələ kubokda finala vəsiqəni təmin etməmişik. Tıbii ki, uduzmaq xoş deyil. İndi bir-birimizə dəstək olub, finala vəsiqə qazanmalıyıq”.