Robert Prosineçki: “Rəqib qismində milli komanda tapa bilməsək, klubla üz-üzə gələcəyik”

“İki həftə Antalyada olduq və mümkün olduğu qədər oyunları izlədim. Baxa bilmədiyim oyunlara köməkçilərim tamaşa etdi. Komandaların hazırlığından razı qaldım. Millinin oyunçularında nə çatışmırsa, onların üzərində təlim-məşq toplanışında çalışacağıq”. Futbolxeber.az-ın Antalyaya ezam olunmuş əməkdaşına verdiyi açıqlamada bu sözləri milli komandamızın baş məşqçisi Robert Prosineçki deyib.

Xorvat mütəxəssis milliyə namizəd olan futbolçuların çatışmazlıqları haqda geniş danışmaq istəməyib: “Çatışmazlıqlar haqda geniş danışmaq istəmirəm. Belə götürdükdə gördüklərimin çoxundan razı qalmışam. Tez-tez top itkisi baş verir, eləcə də bəzi futbolçular topu itirdikdən sonra həvəsdən düşürlər. Bütün bunları da millinin toplanışı zamanı aradan qaldırmağa cəhd edəcəyik”.

Milli komandamızın çalışdırıcısı yığmamızın fevraldakı təlim-məşq toplanışında Rusiyanın “Krasnodar” klubu ilə üz-üzə gələcəyi haqda yayılan xəbərlərə də münasibət bildirib: “Axtarışlar davam edir. Hələ ki heç nə dəqiqləşməyib. Amma rəqib qismində milli komanda tapa bilməsək, klubla üz-üzə gələcəyik”.