Ruslan Əmircanov: “Buraxılan qola görə təkcə Ruslan Abışovu günahlandırmaq olmaz”

“Belə güclü rəqiblə oynamağımız müsbət haldı. “Kuban” Rusiyada ən güclü klublardan biridir. Baş məşqçimiz də güclü klublarla oynamağımızın tərəfdarıdır. Çünki belə olan halda əzif və güclü tərəflərimizi daha dəqiq öyrənirik”. Futbolxeber.az saytının Antalyaya ezam olunmuş əməkdaşına verdiyi açıqlamada bu sözləri “Qəbələ”nin üzvü Ruslan Əmircanov deyib.

Bu gün “Kuban”a 0:2 hesabı ilə uduzduqları oyun barədə danışan Əmircanov, yenilgidə müdafiədəki səhvlərin böyük rol oynadığını bildirib: “Özünüz də gördünüz ki, “Kuban” hər iki qolu müdafiədəki səhvlərimizdən sonra vurdu. Rəqibin bizdən tam üstün olduğunu söyləmək çətindir. İlk qolda ani diqqətsizlik yarandı. İkinci qolda isə Ruslan Abışovun səhvi oldu. Amma səhvə görə təkcə onu günahlandırmaq olmaz. Səhv də hamının günahı var”.

“Qəbələ”nin üzvü meydana yorğun çıxdıqlarını bildirib: “Baş məşqçimiz hər oyundan sonra səhvləri analiz edir, çatışmayan cəhətlərimizi deyir. Bir qədər komandada yorğunluq var. Amma bu da normal haldır. Yorğun ola-ola da meydanda mübarizə aparmalıyıq. Çempionatın ikinci yarısının startına müəyyən vaxta var. Həmin müddətə kimi komanda ideal duruma çatacaq”.