“Simurq” - “İnter” oyunu bu dəfə də danışılmış olub?!

“İnter” - “Simurq” oyunlarından öncə hər zaman komandalardan birinin (adətən “Simurq”un) digərinə 3 xalı hədiyyə edəcəyi haqda söhbətlər gəzir. Futbolxeber.az-ın məlumatına görə, cari mövsümdə isə komandalar arasında baş tutan hər iki matç heç-heçə yekunlaşıb. Bu səbəbdən də çoxları cari mövsümdə (ən azından ilk 3 dövrədə) komandaların bir-birinə güzəştə getməyəcəyini düşünürdü. Lakin bu gün əldə etdiyimiz məlumat sonuncu heç-heçənin “gözdən pərdə asmaq”dan başqa bir şey olmadığını ortaya çıxardı.

Belə ki, ölkəmizdə çıxış edən legioner futbolçulardan biri Zaqatalada baş tutan oyunun nəticəsinin əvvəldən razılaşdırılmış olduğunu deyib. Həmin futbolçu bildirib ki, “İnter”də forma geyən həmyerlisi oyun günü səhər saatlarında sosial şəbəkədə ona qarşılaşmanın 1:1 hesabı ilə başa çatacağını yazıb.

Təbii ki, həmin futbolçunun dediklərinin 100 faiz həqiqət olduğunu iddia edə bilmərik. Amma od olmayan yerdən də tüstü çıxmaz.

QEYD: Məsələ ilə bağlı hər iki tərəfə tribuna verməyə hazırıq. Oyunun 1:1 hesabı ilə başa çatacağını deyən futbolçunun kimliyini isə hələlik yazmağa ehtiyac duymadıq.