Aleksandr Çertoqanov: “Qələbəni biz “Neftçi”yə hədiyyə etdik”

“Sumqayıt”ın üzvü Aleksandr Çertoqanov Premyer Liqanın 16-cı turu çərçivəsində “Neftçi”yə 2:3 hesabı uduzduqları oyun haqda danışıb. Futbolxeber.az saytına verdiyi açıqlamada Çertoqanov adi səhvlərdən rəqibə uduzduqlarını bildirib: “Heç nədən qapımızda qollar gördük. Hər 3 halda özümüz-özümüzə problem yaratdıq. Halbuki yaxşı mübarizə apardıq. Taktikamız elə idi ki, oyunu müdafiədən qurub, əks-hücvumlara çıxmalıydıq. Müəyyən dərəcədə işimizin öhdəsindən gəldik. Hesabı da açdıq. Hər şey yaxşı idi. Amma müdafiədəki səhvlər hər şeyi korladı”.

“Səhvlər təcrübəsizlikdən irəli gəlir” sualını “Sumqayıt”ın futbolçusu belə cavablandırıb: “Təcrübə yoxdu demək düzgün olmaz. Çünki müdafiənin mərkəzində təcrübəli futbolçular oynayır. Daha əvvəl millinin formasını geymiş futbolçulardı. Yalnız sağ cinahda çıxış edən Cəmil Hacıyevi təcrübəsiz hesab etmək olar. Səhvlər aydınlaşdırılacaq. Daha bu cür səhvləri yığışdırmalıyıq. Hər dəfə 2 qol vursaq da, qapımızda 3 qol görüb uduzuduq. “Neftçi” özü təhlükəli epizod yarada bilmədi. Qələbəni biz rəqibə hədiyyə etdik”.