Şəhriyar Məmmədyarov: “Qarabağ” istədiyimiz oyunu sərgiləsin, nəticə pis olsa da başa düşərik”

“Azərbaycan klublarının xüsusən də avrokuboklardakı oyunlarını heç vaxt buraxmıram. Çalışıram televizor vasitəsi ilə də olsa, canlı olaraq izləyim. Bilirəm ki, “Qarabağ” son zamanlar uğurlu nəticələr qazanıb”. Futbolxeber.az saytına verdiyi açıqlamada bu sözləri tanınmış şahmatçı Şəhriyar Məmmədyarov deyib.

Bu gün Avroliqanın qrup mərhələsinin ikinci turu çərçivəsində keçiriləcək “İnter” - “Qarabağ” oyunu haqda danışan Məmmədyarov matçın təmsilçimiz üçün çətin keçəcəyini vurğulayıb: “Qarabağ” son dövrlərdə qazandığı nəticələrə bizləri sevindirir. Amma “İnter”lə bugünkü oyun çox çətin olacaq. Bilirəm, 2 il əvvəl “Neftçi” “İnter”lə səfərdə heç-heçə edib. Amma bu görüş italyanlar üçün əhəmiyyət kəsb etmirdi. Bu dəfə isə vəziyyət fərqlidir. Azarkeşlərin “Qarabağ”ı necə yola salmasından da xəbərdaram. Həmin videoya baxmışam. İnanıram ki, bu, futbolçuların məsuliyyətini daha da artıracaq. Qoy, “Qarabağ” bizim istədiyimiz oyunu sərgiləsin, nəticə pis olsa da başa düşərik”.