“Qarabağ” üçün ümid yeri: “İnter”in ən zəif bəndi odur!

Avroliqanın qrup mərhələsinin ikinci turu çərçivəsində “Qarabağ” səfərdə “İnter”in qonağı olacaq. Futbolxeber.az-ın məlumatına görə, artıq Milana yollanan Ağdam klubunun işi çox çətindir. Çünki “İnter”in heyətindəki ulduzların sayı kifayət qədərdir. Amma 1 futbolçu var ki, o, son zamanlar “İnter”in heyətində olduqca inamsız təsir bağışlayır. Milan təmsilçisinin son zamanlar zəif bəndi Nemanya Vidiçdir. Serb müdafiəçi “A” seriyasının geridə qalan 5 turu ərzində artıq bir neçə dəfə komandasını çətin vəziyyətə salıb.

* “A” seriyasının ilk turu çərçivəsində “Torino”ya qarşı baş tutan matçda Vidiç rəqibə qarşı kobud oynayır və nəticədə “İnter”in qapısına 20-ci dəqiqədə penalti təyin olunur. Lakin Larrondo şansını boşa verir.

* Elə həmin matçda serb müdafiəçi, oyunun son dəqiqəsində hakimə qarşı etdiyi hərəkətə görə meydandan qovulur. Yekun nəticədə “İnter” 2 xal itirir.

* “A” seriyasının üçüncü turu çərçivəsində “İnter” səfərdə “Palermo” ilə görüşür. Matça uğursuz başlayan Vidiç, artıq üçüncü dəqiqədə Vaskesi gözdən qaçırır. Vidiçin səhvini bağışlamayan “Palermo”lu futbolçu “İnter”i məyus edir. Yaxşı ki, Nemanyadan 13 yaş kiçik olan xorvat Kovaçiç vurduğu qolla “İnter”i yenilgidən xilas edir. Yekunda “İnter” yenə də 2 xal itirir.

* Nəhayət, “A” seriyasının beşinci turunda “Kalyari” ilə matçda Vidiç mövsümdə ikinci dəfə rəqibə penalti vurmaq hüququ qazandırır. Maraqlıdır ki, “Torino” ilə matçda olduğu kimi bu dəfə də Vidiçin səbəbkar olduğu penalti qolla nəticlənmir. Yalnız geri dönən topu Ekdal “İnter”in qapısından keçirir.

Göründüyü kimi, 5 oyunda 3 dəfə kobud səhvlə yaddaqalan Vidiç ideal formadan uzaqdır. Bu isə təmsilçimiz üçün əla şansdır. Reynaldo sürəti hesabına serb müdafiəçi ilə bacarsa, “Qarabağ” səfərdə sərfəli nəticəyə ümid edə bilər. Təbii ki, bu ehtimalın gerçəkləşməsi üçün Mazzari ilk növbədə Vidiçi meydana buraxmalıdır...