“Neftçi” Orxan Məmmədovun qərarlarına etiraz edir

“Neftçi” klubu “Qarabağ”a qarşı baş tutan matçın idarəçiliyindən narazı qalıb. Futbolxeber.az klubun rəsmi saytında "Neftçi" - "Qarabağ" oyununda hakimlərin kobud səhvləri” başlıqlı xəbəri olduğu kimi təqdim edir:

- Premyer Liqasının 7-ci turu çərçivəsində keçirilmiş “Neftçi” - “Qarabağ” oyununda hakimlər nəticəyə təsir edən səhvlərlə yadda qalıblar. Nəticəyə birbaşa təsir edən epizodlardan ikisinin video görüntüsünü təqdim edirik. İlk epizodda rəqib futbolçu Reynaldo Silva yan xətt hakiminin gözü qarşısında yarımmüdafiəçimiz Erik Ramosu arxadan ayağı ilə vursa da, baş hakim ona qırmızı vərəqə əvəzinə sarı vərəqə göstərib. İkinci epizodda isə hakim “Neftçi”nin qapısına penalti zərbəsi təyin edib. Halbuki müdafiəçimiz Karlos Kardoso topu uzaqlaşdırarkən rəqib futbolçu Reynaldo Silvaya qarşı heç bir qayda pozuntusuna yol verməmişdi.

Xatırladaq ki, “Neftçi” - “Qarabağ” (1:3) matçının baş hakimi Orxan Məmmədov olub.