Premyer Liqa klublarının hamısı niyə “İnter”in yubileyinə qatılmayıb?

Dünən “İnter” 10 illik yubileyini qeyd etdi. Futbolxeber.az-ın məlumatına görə, əvvəldən tədbirdə digər Premyer Liqa klublarının rəsmilərinin də iştirak edəcəyi deyilsə də, mərasimə yalnız “Neftçi”dən Gündüz Abbaszadə, AZAL-dan isə Eldəniz Yusifov qatıldı.

Məsələyə aydınlıq gətirmək üçün ilk öncə “İnter”in mətbuat xidmətinin rəhbəri Səbuhi Məmmədova müraciət etdik. Klub rəsmisi bütün klublara dəvət göndərdiklərini qeyd etdi: “Bütün klublara poçtla dəvətnamə göndərilmişdi. Necə ola bilər ki, dəvətnamə göndərməyək? Kimisə unutmağımız qeyri-mümkündür. “İnter”in mövcudluğu digər klubların da olmağı ilə bağlıdı. Tədbirə cəmi 2 klubdan nümayəndə gəlmişdi. Onlara dəvətnamə çatır, digərlərinə yox?”

Tədbirə qatılmayan bəzi klub nümayəndələrinə də müraciət etdik. Onların fikirlərini təqdim edirik:

Rüstəm Allahverdiyev (“Simurq”un mətbuat xidmətinin rəhbəri): “Klubumuzun prezidenti tədbirə dəvət almışdı. Sadəcə, işləri ilə əlaqədar olaraq mərasimdə iştirak edə bilməyib”.

Rəşad Məmmədov (“Sumqayıt”ın mətbuat xidmətinin rəhbəri): “Tədbirə dəvət olunmuşduq. Lakin işlərinin çoxluğu ilə əlaqədar olaraq klub prezidenti Kamran Quliyev tədbirə qatıla bilməyib. Bununla belə, Kamran Quliyev bir gün qabaq özü şəxsən “İnter” rəhbərliyinə zəng vuraraq, onları təbrik edib və tədbirdə iştirak edə bilməyəcəyəni diqqətə çatdırıb”.

Anar Hacıyev (“Qəbələ”nin mətbuat xidmətinin rəhbəri): “İnter”dən bizə klub prezidenti Taleh Heydırovun adına dəvətnamə gəlib. Lakin Taleh bəy ölkə xaricində olduğundan mərasimə qatıla bilməyib”.

Hüseyn Cəbrayıloğlu (“Xəzər Lənkəran”ın mətbuat xidmətinin rəhbəri): “Tədbirə dəvət almışdıq. Amma dəvətnamə bir qədər gec gəldiyidindən mərasimdə iştirak edə bilmədik”.