“Bakı”nın yeni məşqçisi: “Çalışırıq ki, komandanı ötən günlərinə qaytaraq”

“Bakı”nın məşqçilər korpusuna qoşulan İlyas Qurbanov klubun rəsmi saytına müsahibə verib. Futbolxeber.az həmin müsahibəni təqdim edir:

- Bir neçə gündür gündür ki, yeni işə başlamısınız. İlk öncə bu münasibətlə sizi təbrik edirik. Bu təyinatı gözləyirdinizmi?

- Təbrik üçün təşəkkür edirəm. Bildiyiniz kimi, burada çıxış etmiş keçmiş futbolçular klub rəhbərliyinin diqqəti sayəsində futboldan kənarda qalmayıb. Mən də karyeramı bitirdikdən sonra “Bakı” futbol klubunun akademiyasında məşqçi kimi fəaliyyətə başladım. Akademiyanın müxtəlif yaş qrupları üzrə komandalarında çalışmışam. Sonuncu dəfə klubun 1999-cu il təvəllüdlülərdən ibarət komandasına rəhbərlik edirdim. Bir neçə həftə bundan qabaq klub rəhbərliyi əsas komandaya kömək etmək barədə təklif etdi. Bu mənim üçün gözlənilməz olsa da, çoxdankı arzumun gerçəkləşməsi üçün çox məmnunam.

- Əsas komandada işiniz nədən ibarət olacaq?

- Baş məşqçiyə kömək edirəm. İşim təlim-məşqlərin təşkilində iştirak, baş məşqçinin məşq planını həyata keçirməklə  ona yardım etməkdən ibarətdir. Çalışacağıq ki, “Bakı”nı ötən günlərinə qaytaraq.

- Akademiyanın yetirmələri ilə Premyer Liqada uğur qazanmaq çətin olmayacaq?

- Bilirsiniz klubun akademiyasında yüzlərlə istedad var. Buradakı mühütdə böyüyən futbolçular buna çoxdan hazır idi. Bizim əsas məqsədimiz buradakı istedadları əsas komandaya cəlb edərək onların bacarıqlarını üzə çıxararaq onları Azərbaycan futboluna qazandırmaqdır. Klub rəhbərliyi gənclər üçün gözəl imkan yaradıb. Bu gün “Qarabağ”da, “Simurq”da və bir çox aparıcı klublarda “Bakı”nın yetirmələri çıxış edir. Biz buna sevinirik. Bu onu göstərir ki, klub doğru yoldadır. Klubun strategiyası milli komandalara futbolçu verməkdir. Ölkə çempionatında nəticə özü gələcək.

- Həm futbolçu, həm də məşqçi kimi “Bakı”nın uğurları üçün çalışmaq arasında hansı fərqlər var?

- Fərq böyükdür. Oynadığımız vaxtlarda işim ancaq məşq və oyunlarda iştirak etmək idisə, indi məsuliyyətimiz ikiqat artıb. Bütün komandanı düşünməli - məşq prossesini, zədəliləri, rəqibləri, psixoloji amilləri, komandanı toparlamağı, güclü-zəif nöqtələri müəyyənləşdirib onları aradan qaldırmağın yollarını tapmalısan. Bir sözlə bu işlər bir-birindən kəskin fərqlənir.

- Bir neçə ay bundan öncə “Bakı”nın “Lans” ilə əməkdaşlığı çərçivəsində Fransada təlim məşq toplanışı keçirən komandalardan biri də sizin çalışdığınız U-16 idi. Fransa təlimləri məşqçi baxışlarınızda nələri dəyişdi?

- Orada təlim-məşq toplanışı zamanı bir neçə yoldaşlıq görüşləri keçirdik. Uşaqlarımız Azərbaycan futbolu ilə Avropa futbolunun fərqini gördülər. Burada biz hamıdan güclü idik, orada isə çox zəif görünürdük. Əlbəttə, bundan nəticə çıxararaq düşüncələrimizdə inqilab etdik. Bundan əlavə 5 yetirməmiz 2 aya yaxın “Atletiko”nun bazasında oldu. Bütün bunlar uşaqlarımız üçün böyük bir təcrübə oldu. Belə bir imkanı bizlər üçün yaradan klub rəhbərliyinə başda Hafiz müəllimə bir daha təşəkkür edirik. Bu işlər davam etdirilir.