Ponomaryov “İnter”i günahlandırdı

Milli komandamızın keçmiş üzvü Anatoli Ponomaryov bir neçə il əvvəl avrokuboklarda meydana çıxa bilməməsinə görə “İnter”i qınaqlayıb. Futbolxeber.az-ın məlumatına görə, Ponomaryov “Sport Den za Dnyom”a müsahibəsində “Vadust”dakı çıxışı barədə deyib: “Klubun böyük ambisiyası var idi. İlk məqsəd Çelenc-liqanın qalibi olub, yüksək liqaya vəsiqə qazanmaq idi. Mövsümün əvvəli də uğurlu alınmışdı. “Vadust” əvvəlcə UEFA kubokunda “Uypeşt”i (evə 4:0, səfərdə 0:1) mübarizədən kənarlaşdırdı, daha sonra “Bazel”lə (1:0, 1:2) başa-baş oynadı. Bu, komandanın tarixi ərzində avrokuboklardakı ən yaxşı çıxış idi. Amma təəssüflənirəm ki, həmin vaxt mən komandanın üzvü olsam da, avrokuboklarda çıxış edə bilmədim. Həmin vaxt “İnter”lə müqaviləm başa çatsa da, Azərbaycan klubu mənim transfer vərəqəmi göndərməyə tələsmirdi. Onlar məsələni həll edincə, artıq yeni mövsüm başlamışdı. Həm avrokubokları, həm də çempionatın ilk 3 turunu kənardan izləməli oldum”.