“Xəzər Lənkəran”lılardan ilk peşəkar müqavilə FOTO

Bu gün "Xəzər Lənkəran" akademiyasının bir neçə yetirməsi doğma klubu ilə karyerasının ilk peşəkar müqaviləsini bağlayıb. Futbolxeber.az-ın klubun rəsmi saytına istinadən verdiyi məlumata görə, öz yaş qruplarında komandanın liderləri olan və mütəmadi olaraq milli komandalara dəvət alan yeniyetmələr artıq növbəti mövsümdən əvəzedici komandanın da iştirak ərizəsinə salınacaqlar. Futbol həyatının yeni mərhələsinə qədəm qoyan futbolçular "Xəzər Lənkəran" Gənclər İnkişaf Proqramının Rəhbəri İlhan Akgül və əvəzedici komandanın baş məşqçisi Elbrus Məmmədovun iştirakı ilə sözləşmələrə imza atdılar.

Müqavilə imzalayan futbolçular (şəkildə soldan sağa): Nurlan Fərəcli (04.09.2000-ci il), Yusif Həsənov (30.11.1999-cu il), İbrahim Qədirzadə (21.03.1999-cu il), Şamxal Sadıqov (01.03.1999-cu il), Sübhan Məmmədli (03.04.2000-ci il).

 Qeyd edək ki, daha bir futbolçu - Xəqani Sadıqov (10.04.2000-ci il) - U-15 milli komandasının toplanışında olduğu üçün onunla müqavilə futbolçu komandanın düşərgəsinə döndükdən sonra bağlanacaq.

 "Xəzər Lənkəran" Futbol Klubu bütün yetirmələrinə yenicə qədəm qoyduqları peşəkar karyerada uğurlar arzu edir, onlara istər ağ-yaşıl formada, istər milli komandanın heyətində yüksək nailiyyətlər diləyir.