“Qarabağ” Azərbaycan futbolunda ilkə imza atdı

Çempionlar Liqasının III təsnifat mərhələsinin ilk oyununda “Qarabağ” öz meydanında “Zalsburq”u 2:1 hesabı ilə məğlub etdi. Futbolxeber.az-ın məlumatına görə, bu nəticəylə “Qarabağ” Çempionlar Liqasının III təsnifat mərhələsində qələbə qazanan ilk Azərbaycan klubu kimi tarixə düşüb. Ağdam klubuna qədər yalnız “Bakı” və “Neftçi” qitənin ən mötəbər klub turnirində III mərhələyə yüksəlməyi bacarsalar da, hər iki bu turda qalibiyyət əldə edə bilməyib.

İlk dəfə olaraq təmsilçilərimizdən “Bakı” 2009-2010 mövsümündə ÇL-in III təsnifat mərhələsinə yüksəlib. “Zolaqlılar” Bolqarıstan çempionu “Levski”ylə ilk görüşdə Bakıda qolsuz bərabərliyə razılaşıb, səfərdə isə rəqibinə 0:2 hesabı ilə uduzub. 2012-2013 mövsümündə isə ÇL-in III təsnifat mərhələsində “Neftçi” Kiryat Şimona “Hapoel”ı ilə üz-üzə gəlib. Səfərdə rəqibinə 0:4 hesabı ilə uduzan “Neftçi”, cavab oyununda 2:2-lik bərabərliyə razılaşıb.