Böyükağa Hacıyev: “Qalib gələcəyimizə əmin idim”

"İlk oyundan sonra "Koper"i yaxşı analiz etmişdik. Bilirdik ki, rəqib əsasən müdafiədə oynayacaq. Bizim isə oyun fəlsəfəmiz hücum futbolu üzərində qurulub”. Futbolxeber.az-ın məlumatına görə, bu sözləri “Koper”lə oyundan sonra “Neftçi”nin baş məşqçisi Böyükağa Hacıyev deyib.

Sloveniya mətbuatına danışan B.Hacıyev görüşdən əvvəl qələbəyə əmin olduğunu bildirib: “Bakıdakı qarşılaşmada müəyyən səhvlərə yol verdik. Futbolçularım həmin səhvlərdən nəticə çıxarmışdı. Qalib gələcəyimizə əmin idim. İlk oyundan sonra bildirmişdim ki, mərhələni adlamasaq, istefa verəcəyəm. Rəqibə də uğurlar arzulayıram. "Koper"in futbolçuları  əsl döyüşçüdürlər. Ancaq biz onlardan yaxşı oynadıq".

Xatırladaq ki, ilk oyunda rəqibinə 1:2 hesabı ilə uduzan "Neftçi" cavab matçında 2:0 hesabı ilə qalib gələrək Avroliqanın III təsnifat mərhələsinə yüksəlib.