“Çixura”nı yaxından tanıyaq

Avroliqanın III təsnifat mərhələsində “Neftçi” Gürcüstanın “Çixura” klubu ilə qarşılaşacaq. Futbolxeber.az-ın məlumatına görə, Saçxere şəhərini təmsil edən bu klubun əsası 1936-cı ildə qoyulub. Amma “Çixura” Gürcüstan yüksək liqasında yalnız 2006-2007 mövsümündə debüt edib. Komandanın “siftə”si uğursuz alınıb və “Çixura” 12-ci yeri tutmaqla yenidən I diviziona yuvarlanıb. Bir neçə il orada mübarizə aparan Saçxere təmsilçisi 2011/12 mövsümündə I divizonun qalibi olmaqla, yenidən yüksək liqaya vəsiqə əldə edib.

“Çixura” son mövsümdə tarixində ilk dəfə olaraq Gürcüstan çempionatında medalçılar sırasına düşərək, bürünc medala sahib çıxıb. 2013-cü ildə Gürcüstan kubokunda finalda yenilgi acısı yaşayan “Neftçi”nin rəqibi, ötən il ölkə Superkubokuna sahib çıxıb.  

“Çixura” ev oyunlarını Saçxere şəhərindəki Mərkəzi stadionda keçirir. Həmin arenanın tamaşaçı tutumu 4 mindir. Amma “Çixura” yalnız daxili yarışlarda bu arenanın xidmətindən yararlanır. Avrokuboklarda isə Saçxere təmsilçisi Tbilisidəki Mixail Mesxi adına stadiondan yararlanır.

“Çixura”nın heyətində azərbaycanlı futbolsevərlərə tanış sima da var. Bu, komandanın kapitanı David Obikadzedir. 33 yaşlı futbolçu 2009-2011-ci illərdə “İnter”in heyətində çıxış edib. “Bankirlər”in heyətində keçirdiyi 53 oyunda gürcü futbolçu 5 qol vurub.