“Elfsborq”a qarşı oynamayacağam”

“Zədəm hələ də davam edir. Elə indi də ayağımda ağrılar var”. Futbolxeber.az saytına verdiyi açıqlamada bu sözləri “İnter”in üzvü Elvin Məmmədov deyib.

Ayağından zədə alan təcrübəli futbolçu bu səbəbdən Avroliqanın I təsnifat mərhələsinin cavab oyunu çərçivəsində “Tiraspol”a qarşı baş tutan cavab oyununu kənardan izləmişdi. Həmin vaxt futbolçuların 1 həftə yaşıl meydandan kənarda qalacağı deyilsə də, Elvin II təsnifat mərhələsinin ilk oyunu çərçivəsində “Elfsborq”a qarşı baş tutacaq matçda da meydana çıxa bilməyəcək: “Elfsborq”la ilk oyunda meydana çıxa bilməyəcəyəm. Bu, dəqiqdir. İsveçə aparılıb-aparılmayacağım hələ bilinmir. Bu gün baş məşqçi Kaxaber Tsaxadadze ilə danışacam. Yəqin ki Bakıda qalaram”.

“Bəs, cavab oyununda meydana çıxa biləcəksən” sualını Məmmədov belə cavablandırıb: “İndidən bu haqda nəsə deyə bilmərəm. Bəlkə də həmin oyuna kimi zədəm bərpa olar. Amma formamı da bərpa etməliyəm. Təkcə zədəylə iş bitmir”.