Kamal Quliyev: “Dünən Fredin etdiyi hərəkəti mən də Serbiya ilə oyunda etmişdim”

“Həmin epizodda penalti yox idi. Səhv qərar ondan irəli gəlir ki, hakim həmin anda aldandı”. Futbolxeber.az-ın məlumatına görə, bu sözləri millimizin keçmiş üzvü Kamal Quliyev deyib.

“ATV” telekanalında yayımlanan və Sənan Şəfizadənin aparıcısı olduğu “MUNDİAL 2014” proqramında qonaq olan veteran futbolçu dünən DÇ-2014 çərçivəsində keçirilən Braziliya - Xorvatiya (3:1) oyunundakı penalti epizodunu şərh edib.

Kamal Quliyev vaxtı ilə buna bənzər hərəkət etdiyini bildirib: “Əhməd Ələsgərovun bir sözü var: penaltinin 50 faizi epizoddan, 50 faizi də futbolçudan asılıdır. Əgər, futbolçu özünü ustalıqla yerə ata bilirsə, hakim mütləq aldanacaq. Dünən də belə oldu. Hakim epizoda yaxın idi və hər şeyi görürdü. Sadəcə, açılış oyununun gətirdiyi gərginlik, yerli publikanın Braziliyaya verdiyi dəstək onun qərarına təsir göstərdi. Etiraf edim ki, Bakıda Serbiyanı 2:1 hesabı ilə məğlub etdiyimiz oyunda mən də bu cür hərəkət etmişdim. Yıxıldığım epizodda penalti 60-70 faiz var idi. Amma özümü yerə elə atdım ki, hakim qəti şəkildə nöqtəni göstərdi”.