Foqts: “Azərbaycanda futzal futboldan öndə gəlir”

Milli komandamızın baş məşqçisi Berti Foqts UEFA-nın rəsmi saytına açıqlama verib. Futbolxeber.az-ın məlumatına görə, alman məşqçi Bakıda keçiriləcək futzal üzrə “dördlər finalı” haqda danışıb: "Azərbaycan azarkeşləri UEFA kubokunun "dördlər finalı"nda əsl bayram əhval-ruhiyyəsi yaradacaqlar. Bu turnir təkcə maraqlı yarış kimi deyil, eyni zamanda azarkeşlərin dəstəyi baxımından da yadda qalacaq. Azərbaycanlı fanatlar öz komandalarını necə ruhlandıracaqlarını yaxşı bilirlər. Futbolçu olduğumuz vaxtlarda arabir biz də futzal oynayırdıq. Ancaq bu idman növü Almaniyada elə də məşhur deyil.

Azərbaycan millisinin baş məşqçisi təyin olunduqdan sonra bu ölkənin yığmasının və klubların futzaldakı uğurları məni də maraqlandırdı. Onu deyə bilərəm ki, Azərbaycanda futzal yerli futboldan öndə gəlir. Əvvəllər futzal oynasam da, bu oyunları heç vaxt tribunadan izləməmişəm. Futzalla futbolu müqayisə etmək də tamamilə yanlışdır. Burada fərqli fəlsəfə, fərqli toplar, yanaşma müxtəlifliyi var. Hətta vurulan qollar da fərqli ölçüdədir".