Basketbol Liqasında yeni mövsümün açılışı ilə bağlı tədbir keçirilib

Azərbaycan Basketbol Liqasında 2025-2026-cı illər mövsümünün açılışına həsr olunmuş mərasim keçirilib.

Futbolxeber.az saytının məlumatına görə, tədbirdə əvvəlcə Dövlət Himni səsləndirilib. Daha sonra ötən mövsümün hesabatı təqdim olunub, monitorda Azərbaycan basketbolu ilə bağlı videoçarx nümayiş etdirilib.

Reqlamentə əsasən, çempionatın oyunları 4 dövrəli, 20 turdan ibarət sistem üzrə keçiriləcək. Müntəzəm mövsümün oyunları A və B qrupları üzrə baş tutacaq. Ötən mövsüm göstərdikləri yekun nəticələrə əsasən, klubların mübarizə aparacaqları qruplar aşağıdakı kimidir:

A qrupu: "Sabah", "Neftçi", "Şəki", "Abşeron Lions", NTD, "Gəncə"

B qrupu: "Naxçıvan", "Ordu", "Sərhədçi", "Sumqayıt", "Quba", "Lənkəran"

Müntəzəm çempionatın A qrupunun oyunlarında meydançada 4 əcnəbi və mütləq şəkildə 1 yerli basketbolçunun iştirak etməsi əsas şərt olacaq. B qrupunun oyunlarında isə 15-ci tur daxil olmaqla 3 əcnəbi və 2 yerli basketbolçu, 16-cı turdan etibarən isə 4 əcnəbi və 1 yerli basketbolçunun parketdə olması mütləqdir. A qrupunu ilk 3 sırada tamamlayan klublarla yanaşı, B qrupunun lideri pley-offun 1/4 final mərhələsinə vəsiqə qazanacaq. A və B qruplarında digər yerləri tutan komandalar isə pley-offun 1/8 final mərhələsində üz-üzə gələcəklər. 1/8 finalda ən tez iki qələbə qazanan klublar 1/4 finala yüksələcəklər. Həm 1/4 final, həm də yarımfinal seriyaları 2 qələbəyə qədər davam edəcək. Final seriyasında isə ən tez 3 qələbə qazanan klub Azərbaycan Basketbol Liqasının (ABL) çempionu olacaq.

Qeyd edək ki, çempionatın yekun nəticələrinə əsasən, mövsümü ilk “8-lik”də tamamlayan klublar növbəti ildən I Liqada (ABL), 9–12-ci yerləri tutmuş klublar isə ilk dəfə təşkil olunacaq II Liqada (ABL 2) mübarizə aparacaqlar.