Rüstəm Əfsərli: “Karambö, Desayi, Qullit, Şmeyxeldən razılıq almışıq”

“Paris fan zonasının yaxınlığında Eyfel qülləsinin qarşısında studiyamız var. Sabahdan etibarən gündə 3 dəfə canlı yayıma çıxırıq”. Futbolxeber.az saytına açıqlamasında bu sözləri “CBC-Sport”un şərhçilər qrupunun rəhbəri, hazırda AVRO-2016 ilə bağlı Parisdə olan Rüstəm Əfsərli deyib.

Əfsərli sabahdan etibarən start götürəcək qitə birinciliyi ilə bağlı “CBC-Sport”da yayımlanacaq “Paris gündəliyi” proqramı hada bunları söyləyib: “Avropa çempionatının ən maraqlı hadisələrindən və səhnə arxasında qalan məsələlərdən danışacağıq. Həmçinin, burada olan müxbirimizin komandaların düşərgələrinə yollanması planlaşdırılır. Məsələn, Rusiya, Türkiyə və Portuqaliya kimi millilərin. (Rusiya və Portuqaliya Parisdə düşərgə qurub, Türkiyə isə bir oyuna gələcək). Həmçinin, keçmiş futbolçular, əfsanələr, Avropa çempionatının qonaqlarını studiyamıza dəvət edəcəyik. Bir neçəsi razılıq verib. Hamının adını açıqlamaq olmur, amma Kristian Karambö, Marsel Desayi, Ruud Qullit, Peter Şmeyxel və b. gözlənilir. Əlbəttə, çalışacağıq ki, digər insanlarla da söhbətləşək. Bundan əlavə, burada Parisdə çalışan türkiyəli, rusiyalı, avropalı jurnalistlərlə də əlaqə qurmuşuq. Amma Doktor Ziya ilə ikimiz hər gün canlı yayımdayıq”.