AVRO-2016-nın bombardiri: “Bu oyunu Azərbaycanla görüşlə müqayisə etmək olmaz”

“Daha əvvəl Azərbaycan yığmasına da 5:0 hesabı ilə qalib gəlmişdik. Çoxları düşünə bilər ki, eynisəviyyəli rəqiblərə qarşı mübarizə aparmışıq. Amma belə deyil. Bu oyunu Azərbaycanla görüşlə müqayisə etmək olmaz”. Futbolxeber.az saytına açıqlamasında bu sözləri Portuqaliyanın U-17 millisinin üzvü, 6 qolla Bakıda keçirilən Avropa çempionatının bombardiri olan Joze Qomes deyib.

Gənc futbolçu yarımfinala yüksələn Portuqaliya yığmasının turnirin favoriti olması fikri ilə razılaşmayıb: “Biz özümüzü favorit hesab etmirik. Hər oyuna ciddi hazırlaşırıq. Məqsədimiz hər matçda qalib gəlməkdir. Növbəti rəqibin bizim üçün heç bir fərqi yoxdur”.

Qomes bombardirlik haqda düşünmədiyini qeyd edib: “4 oyunda 6 qol vurmağım yaxşı nəticədir. Amma vurduğum qollarda komanda yoldaşlarımın böyük rolu var. Çünki onların ötürmələrindən sonra fərqlənirəm. Əsas olan komandamın uğur qazanmasıdır”. 

"Layihə AFFA yanında Media Komitəsi tərəfindən maliyyələşdirilir"