İngiltərə millisinin baş məşqçisi: “İspanları mübarizədən kənarlaşdıra bilərik”

İngiltərənin U-17 millisinin baş məşqçisi Stiven Kuper Futbolxeber.az saytına müsahibə verib.

- Avropa çempionatında mübarizəni davam etdirən 8 komanda arasında İngiltərə yığması da var. Halbuki turnirə məğlubiyyətlə başlamışdınız. İsveçdən alınan yenilgidən sonra qrupdan çıxacağınıza inanırdınız?

- Əlbəttə. Birinci oyunda İsveçə uduzsaq da, komandam yaxşı oynamışdı. Yenilgiyə baxmayaraq, futbolçularım xarakter nümayiş etdirdi. Növbəti 2 görüşdə gözəl oyun sərgilədik. Həm Fransa, həm də Danimarkaya qarşı yaxşı çıxış etdik və lazımi nəticəni qazandıq.

- Danimarka ilə oyuna komandanız çox yaxşı başladı. Amma futbolçular ard-arda qol epizodlarını sağa-sola xərcləyirdi. Buna səbəb nə idi?

- Unutmayaq ki, Danimarka yaxşı təşkil olunmuş komandadır. Xüsusən də müdafiə xətləri güclüdür. Təsadüfi deyil ki, ilk 2 matçda qapılarını toxunulmaz saxlamışdılar. Oyunun əvvəlində epizodları qaçırsaq da, hücumlara ara vermədik və  sonda da lazım olan qolları vurduq.

- Avropa çempionatında bundan sonrakı hədəfiniz nədir?

- Hazırda fikrimizi ancaq növbəti oyuna yönəltmişik. 1/4 finalda İspaniya ilə qarşılaşacağıq. Rəqibimiz çox güclüdür. Belə bir turnirdə 1/4 finalda ispanlara qarşı oynamaq çox maraqlı olacaq.

- İngiltərə yığması İspaniyanı nəyin hesabına məğlub edə bilər?

- Bunun üçün ilk növbədə öz oyunumuzu göstərməliyik. Biz ispanları mübarizədən kənarlaşdıra bilərik. Komandamızın öz fəlsəfəsi var. Əlimizdən gələni edəcəyik ki, bu dəfə də oyun üslubumuzu ortaya qoyaq.

- Yarımfinalda ilk matçda uduzduğunuz İsveçlə qarşılaşmaq istərdiniz?

- Hazırda məni ancaq növbəti oyun düşündürür. Bu haqda yalnız yarımfinala yüksəldikdən sonra danışmaq olar.

"Layihə AFFA yanında Media Komitəsi tərəfindən maliyyələşdirilir"