AVRO-2016: “Birinci hissədə İtaliya bizdən yaxşı oynadı”

“Oyunun çətin olacağını bilirdik. Buna da hazır idik. Etiraf edim ki, birinci hissədə İtaliya bizdən yaxşı oynadı. Buna görə də fasilədə müəyyən dəyişikliklər etdik”. Futbolxeber.az saytına müsahibəsində bu sözləri İspaniyanın U-17 millisinin baş məşqçisi Santi Denia deyib.

Onun komandası Bakıda keçirilən Avropa çempionatınında İtaliyanı məğlub etməklə 1/4 finala adlayıb: “Finala bərabər görüş idi. Çox vacib qələbə qazandıq və yolumuza davam edirik. Bu, qrupdakı ən mühüm oyun idi. Qrupumuzdakı bütün komandaların 1/4 finala adlamaq şansı qalırdı”.

Denia qeyd edib ki, İtaliya millisi müdafiə yox, hücum futbolu sərgiləyib: “Bəli, “Skuadra Adzurra” müdafiə futbolu ilə seçilir. Amma biz onların 4-5 oyunlarına baxmışdıq. Həmin görüşlərdə də komanda müdafiədə səhvlər buraxsa da, hücumameyilli futbol sərgiləyirdilər. İtaliya yaxşı təşkil olunmuş komandadır. Göstərdiyi oyuna görə rəqibi təbrik edirəm”.

Hesab 2:2 olarkən həyəcanlandığını qeyd edən İspaniyanın baş məşqçisi qeyd edib ki, 1/4 finaldakı rəqibin kimliyi önəm daşımır: “C” qrupunda hər komandanın qrupdan çıxmaq şansı var. 4 komandanın hər biri güclü rəqibdir. Hansısa birini xüsusi qeyd edə bilmərəm”.

"Layihə AFFA yanında Media Komitəsi tərəfindən maliyyələşdirilir"