Prosineçki: “U-17-də bəyəndiyim futbolçuların adlarını çəksəm...”

“U-17 Şotlandiya ilə oyunda yaxşı nəticə qazandı. Oyun baxımından fərqli hissələr gördük”. Futbolxeber.az saytına müsahibəsində bu sözləri əsas millimizin baş məşqçisi Robert Prosineçki deyib.

Avropa çempionatında 3 oyunda 4 xal toplayan 17 yaşadək futbolçulardan ibarət yığmamızın çıxışını dəyərləndirən xorvat mütəxəssis Təbriz Həsənovun komandasından razılıq edib: “Şotlandiya ilə oyunun ikinci hissəsində komanda çox yaxşı mübarizə aparırdı. Futbolçular topu özlərində yaxşı saxlayırdılar. Sonda da komanda layiq olduğu qolu vurdu. Düşünürəm ki, qeydə alınan nəticə düzgün idi. Təəssüflər olsun ki, komanda Portuqaliyaya qarşı zəif təsir bağışladı. Bunun da bir çox səbəbləri var. Rəqibin güclü olması ilə yanaşı, stadiondakı atmosferi də qeyd etmək lazımdır. Azarkeşlərin çoxluğu, stadiondakı ab-hava komandaya böyük təzyiq göstərmişdi. Bununla belə, sonradan futbolçular özlərini göstərə bildilər”.

Prosineçki qeyd edib ki, bu gün U-17-də gələcəkdə əsas millini gücləndirəcək futbolçular var: “Bəli, bugünkü U-17-də gələcəkdə əsas milliyə namizəd olacaq futbolçular var. Bəzi futbolçuları bəyənmişəm. Amma ad çəksəm, həmin oyunçularda arxayınçılıq yarana bilər. Hazırda onlar gəncdirlər. Əvvəlcə peşəkar futbola uyğunlaşmalı, klublarında əsas komandaya cəlb olunmalıdırlar. Daha sonra isə yığmaya dəvət alacaqlar”.

"Layihə AFFA yanında Media Komitəsi tərəfindən maliyyələşdirilir"