Alessandro Dal Kanto “Hollandiyadan zəif deyildik”

İtaliyanın U-17 millisinin baş məşqçisi Alessandro Dal Kanto Futbolxeber.az saytına müsahibə verib.

- Avropa çempionatındakı ikinci oyunda komandanız Hollandiyaya uduzdu. Qarşılaşma haqda nə deyə bilərsiz?

- Fikrimcə, komandam bu gün yaxşı oynadı. Hollandiyadan zəif deyildik. Matç ərzində qol vurmaq üçün 2-3 real şansımız oldu. Uduzduğumuz üçün məyusam. Artıq növbəti oyun barədə düşünəcəyik. Çalışacağıq ki, İspaniyanı məğlub edək.

- Bu məğlubiyyətlə komandanızın qrupdakı vəziyyəti pisləşdi. Necə düşünürsüz, 1/4 finala yüksəlmək mümkün olacaq?

- Bu haqda indidən nəsə demək çətindir. Çünki İspaniya da güclü komandadır. Necə olacağını zaman göstərəcək.

- Hollandiya ilə oyunun gedişində heç-heçə qorumaq barədə düşünürdüz?

- Yox, heç-heçəni düşünmürdük. Qalib gəlmək istəyirdik. Amma turnir cədvəli baxımından heç-heçə də bizə sərf edirdi.

- İtaliya millisi daim müdafiə xəttinin güclü olması ilə seçilib. Amma sizin komandanızda sanki hücum xətti müdafiədən daha güclüdür...

- Müdafiə xəttimizin zəif olması fikri ilə razı deyiləm. Nəzərə almaq lazımdır ki, rəqiblərimiz də güclüdür. Bu gün sərəncamımda Barezi, Maldini kimi futbolçular yoxdur.

"Layihə AFFA yanında Media Komitəsi tərəfindən maliyyələşdirilir"