Kapitanımız azarkeşlərə səsləndi: “Portuqaliya ilə oyunda hamınızı gözləyirik”

U-17 millimizin kapitanı Elçin Əsədov Futbolxeber.az saytına müsahibə verib.

- Avropa çempionatında Portuqaliyaya qarşı keçirəcəyiniz oyuna artıq saatlar qalıb. Hazırda komandada vəziyyət necədir?

- Bütün komanda oyuna köklənib. Turnirə çox ciddi hazırlaşmışıq. Sabahkı oyunda məqsədimiz qələbə qazanmaqdır.

- Sabahkı oyunda hansı nəticəyə ümid edirsən?

- Portuqaliyanın gücü hamıya məlumdur. Buna görə də bir qədər qapalı sistemdə oynayacağıq. Məqsədimiz inamlı oyun göstərib, qalib gəlməkdir.

- Bir müddət əvvəl zədədən əziyyət çəkirdin. Hazırda vəziyyətin necədir?

- Zədəm yüngül idi. Həkimlərimizin sayəsində artıq heç bir problem yoxdur. Meydana çıxmağa tam hazıram.

- Təbriz Həsənov sizi çətin sınağa necə hazırlayır?

- Komanda şəklində, eləcə də olaraq söhbətlər olur. Psixoloji cəhətdən baş məşqçimiz bizi görüşlərə çox yaxşı hazırlayır.

- Konkret olaraq nə deyir?

- Rəqibdən çəkinməməyimizi istəyir. Qeyd edir ki, öz oyunumuzu sərgiləsək, istədiyimiz nəticəni qazana bilərik.

- Çoxları sabahkı görüşün favoriti kimi Portuqaliyanı göstərir. Bu məqam sizdə qıcıq yaradır?

- Bəli, rəqibimiz güclüdür. Bunu bilsək də, rəqibdən qorxumuruq. Futbolda sürpriz nəticələr tez-tez qeydə alınır. 17 yaşlıların mübarizəsində isə hər şey mümkündür.

- Komandanın kapitanı olaraq azarkeşlərə nə demək istərdin?

- Bilsinlər ki, biz meydanda canımızı qoyacağıq, əlimizdən gələni edəcəyik. Portuqaliya ilə oyunda hamını stadionda gözləyirik.

"Layihə AFFA yanında Media Komitəsi tərəfindən maliyyələşdirilir"