“Kocaelispor” 16 ildən sonra Superliqada

Yeni mövsüm üçün Türkiyə Superliqasına vəsiqə qazanan ilk komanda məlum olub.

Futbolxeber.az saytının məlumatına görə, “Kocaelispor” 1-ci liqada sona 3 tur qalmış bunu bacarıb. Komanda növbəti turların nəticələrindən asılı olmayaraq, çempionluğu təmin edib və elitaya vəsiqə qazanıb.

Azərbaycanlı futbolçu Vüsal İsgəndərlinin yer aldığı “Boluspor”un “Karagümrük”ə qalib gəlməsi (1:0) “Kocalespor”un mövsümü çempion kimi başa vuracağını rəsmiləşdirib.

Hazırda lider "Kocaelispor"un (34 oyun) 69, ən yaxın izləyicisi "Karagümrük"ün (35 oyun) isə 60 xalı var.

“Kocaelispor” sonuncu dəfə 16 il əvvəl - 2008-2009-cu mövsümündə Superliqada çıxış edib. Maraq üçün qeyd edək ki, həmin mövsüm Azərbaycan milli komandasının sabiq kapitanı və müdafiəçisi Rəşad Sadıqovla Ramal Hüseynov da "Kocaelispor"da oynayıb.