Son 5 oyunda 3-cü dəfə meydandan qovuldu

La Liqanın 21-ci turu çərçivəsində “Selta”ya qarşı keçirilən oyunda “Atletiko”nun müdafiəçisi Stefan Saviç qırmızı vərəqə alıb.

Futbolxeber.az saytının xarici KİV-ə istinadən verdiyi məlumata görə, serb müdafiəçi matçın 70-ci dəqiqəsində meydandan qovulub. O, Haris Seferoviçə qarşı son ümid foluna görə qırmızı vərəqə alıb.

Bununla da Saviç qeyri-adi göstəriciyə imza atıb. Belə ki, “Atletiko”nun müdafiəçisi son 5 oyunda 3-cü dəfə meydandan qovulub.

Daha əvvəl o, 16-cı turda “Barselona” (0:1) ilə görüşdə Ferran Torreslə əlbəyaxa olduğu üçün qırmızı vərəqə almış və federasiya tərəfindən 2 oyunluq cəzalandırılmışdı.

Həmçinin, İspaniya kubokunun 1/4 final mərhələsində “Real”la matçda Eduardo Kamavinqaya qarşı kobud oyun səbəbindən təcrübəli müdafiəçi meydanı vaxtından əvvəl tərk etmişdi.