Premyer Liqa klubu baş məşqçisiz qaldı

İngiltərənin “Sautgempton” klubu baş məşqçisiz qalıb.

Futbolxeber.az saytının xarici KİV-ə istinadən verdiyi məlumata görə, klub rəhbərliyi Natan Consu baş məşqçi vəzifəsindən qovub. Buna komandanın uğursuz çıxışı səbəb olub.

Belə ki, dünən Premyer Liqanın 22-ci turunda “Vulverhempton”dan alınan 1:2 hesablı yenilgi klub rəhbərliyin səbr kasasını daşırıb. “Sautgempton” öz meydanında keçirdiyi görüşdə hesabda öndə olsa da, 10 nəfərlə qalan rəqib komanda azlıqda oynamasına baxmayaraq, 2 qol vurmaqla qələbə qazanıb. Bu, Natan Consun rəhbərliyi altında komandanın ardıcıl üçüncü, son 5 oyunda isə dördüncü məğlubiyyətidir.

“Sautgempton” 15 xalla 20 komanda arasında sonuncu pillədə qərarlaşıb.

Qeyd edək ki, 49 yaşlı uelsli mütəxəssis ötən il noyabrın 10-dan klubu çalışdırırdı.