Samuel Eto’o karyerasını başa vurdu

Kamerunlu hücumçu Samuel Eto’o futbolçu karyerasını başa vurub.

Futbolxeber.az saytının məlumatına görə, bununla bağlı veteran futbolçu “İnstagram”da paylaşım edub: “Bu, sondur. Qarşıda yeni çağırışlar var. Hamıya təşəkkür”.

Qeyd edək ki, 38 yaşlı futbolçu karyerası ərzində “Real”, “Leqanes”, “Malyorka”, “Barselona”, “İnter”, “Anji”, “Çelsi”, “Everton”, “Sampdoriya”, “Antalyaspor” və “Konyaspor”, “Qətər SK”-da oynayıb.

O, vurduğu 56 qolla Kamerun millisinin tarixində ən məhsular hücumçudur. Eto’o dörd dəfə - 2003, 2004, 2005, 2010-cu illərdə  Afrikanın ən yaxşı futbolçusu seçilib.

Eto’o karyerası ərzində 4 dəfə İspaniya kubokunun (2003, 2005, 2006, 2009), 3 dəfə İspaniya çempionatının (2004/05, 2005/06, 2008/09), 2 dəfə İspaniya Superkubokunun (2005, 2006), 3 dəfə Çempionlar Liqasının (2005/06, 2008/09, 2009/10), İtaliya çempionatının (2009/10), 2 dəfə İtaliya kubokunun (2009/10, 2010/11), İtaliya Superkubokunun (2010), Klublararası dünya çempionatının (2010), 2 dəfə Afrika Millətlər Kubokunu (2000, 2002) qalibi olmaqla yanaşı, 2000-ci ildə də Olimpiya çempionu olub.