“Qalatasaray” və Diarra arasında qalmaqal

“Qalatasaray” və Lassana Diarra arasında qalmaqal yaşanır. Futbolxeber.az saytının məlumatına görə, fransız futbolçu bir müddət əvvəl İstanbul klubuna keçməyə yaxın olsa da, transfer sonda baş tutmamışdı.

“Qalatasaray”ın idman direktoru Levent Nazifoğlu keçidin baş tutmamasını Diarranın şıltağlığı ilə əlaqələndirib: “Diarranın qəribə istəkləri var idi. O, bizdən yaşamaq üçün kirayə haqqı 30 min avro olan villa və hər birinin qiyməti 150 min avro olan 2 avtomobil tələb etdi. Bu isə bizə sərf etmədi. Ona görə də danışıqları dayandırdıq”.

Çox keçmədən Diarranın nümayəndələri “Qalatasaray”ın iddialarına cavab veriblər.

Qarşı tərəf Nazifoğlunun açıqlamasını absurd adlandırıb: “Nə ev, nə maşın? Bu, absurddur. Sadəcə təklif Lassananı qane etmədi. Razılıq əldə olunmamış keçidlə bağlı ictimaiyyəti məlumatlandırmaq “Qalatasaray”ın qeyri-peşəkarlığını göstərir. Yayılan açıqlama bəhanədir. Klub rəsmiləri bizi çox məyus etdilər”.