“Barselona” “A” seriyasında çıxış edən 3 futbolçuyla maraqlanır

“Barselona” heyətini gücləndirmək üçün diqqətini İtaliya “A” seriyasına yönəldib. Futbolxeber.az-ın məlumatına görə, Kataloniya klubunun idman direktoru Aryedo Brayda dünən “Sassuolo” - “Empoli” matçını (3:2) canlı olaraq stadiondan izləyib.

Bu qarşılaşmada “Barselona” rəsmisi 3 futbolçunun çıxışına tamaşa edib. “Sassuolo”nun 2 futbolçusu “Barsa”nın diqqətini çəkir. Söhbət 24 yaşlı xorvat müdafiəçi Şime Vrsalko və 21 yaşlı xavbek Domeniko Berardidən gedir. Berardi “Empoli” ilə görüşdə qol vurmaqla yanaşı, məhsuldar ötürməylə də yadda qalıb. Katalonların maraqlandığı üçüncü futbolçu isə “Empoli”nin yarımmüdafiəçisi Leandro Paredesdi. Onun transfer hüququ “Roma”ya məxsusdur.

Qeyd edək ki, Berardinin transfer dəyəri 18, Vrsalko 9, Paredes isə 5 milyon avro civarında dəyərləndirilir.