“Qarabağ”ın rəqiblərindən eynihesablı qələbə

Avroliqanın qrup mərhələsində “Qarabağ”la eyni qrupda yer alan “Tottenhem” və “Monako” bu gün ölkə çempionatında növbəti oyunlarını keçirib. Futbolxeber.az-ın məlumatına görə, “Tottenhem” IV tur çərçivəsində səfərdə “Sanderlend”in qonağı olub. Matç London klubunun 1:0 hesablı qələbəsi ilə başa çatıb. “Tottenhem”ə qələbə gətirən qolu matçın 82-ci dəqiqəsində Mason vurub. Bununla da mövsümdə ilk qələbəsini qazanaraq xallarının sayını 6-ya çatdıran “Tottenhem” 6 xalla 13-cü pillədə qərarlaşıb.

Səfərdə “Ayaçço”nun qonağı olan “Monako” da minimal hesablı qələbəyə sevinib. “Knyazlıq klubu”na qələbə gətirən yeganə qolu matçın 17-ci dəqiqəsində penaltidən Fabinho vurub. Bununla da xal hesabını 8-ə çatdıran “Monako” 9-cu pilləyə yüksəlib.