Nikolay Pisarev Azərbaycan millisinin qatılacağı turnirdən danışdı

Rusiya Futbol İttifaqının idman direktoru Nikolay Pisarev 3-11 yanvar tarixlərində Sankt-Peterburqda Valentin Qranatkinin xatirəsinə keçiriləcək turnir haqda danışıb. Futbolxeber.az-ın məlumatına görə, Pisarev yarışdakı komandaların saylarının çox olmasından məmnun olduğunu qeyd edib: “Qranatkinin xatirəsinə həsr olunmuş turnirdə güclü komandalar iştirak edəcək. Bu yarışda debütant futbolçuları da iş başında görə biləcəyik. Üstəlik, bu il Rusiya millisi yarışda 2 komanda ilə təmsil olunacaq. 1998-ci il təvəllüdlü futbolçulardan ibarət ikinci komanda ekstremal vəziyyətdə turnirə dəvət aldı. Təcrübə göstərir ki, turnirin sonunda məşqçilər öz komandaların yeni futbolçular cəlb edə bilirlər. Uşaqların özlərini göstərməsi üçün yaxşı şərait yaranıb. Turnirdə mübarizə aparacaq komandaların sayının çox olması da sevindirici məqamdır. İstərdim ki, əvvəl olduğu kimi yenə də oyunları xeyli sayda tamaşaçı izləsin. Çünki biz elə onlar üçün Sankt-Peterburqa yollanırıq”.

Qeyd edək ki, Pisarevin ekstremal vəziyyətdə turnirə dəvət olmuş komanda adlandırdığı Rusiya-2 millisi F qrupunda Yaponiya ilə birgə Azərbaycan yığmasının rəqibidir. Millimiz Rusiya-2 komandası ilə yanvarın 4-də üz-üzə gələcək.