“Ayaks”ın hücumçusu 1 oyunda 6 qol vururaq Suarezin yolu ilə getdi

Hollandiya kubokunun ikinci mərhələsi çərçivəsində səfərdə “Yos Vaterqrafsmer”lə qarşılaşan “Ayaks” rəqibini 9:0 hesabı ilə məğlub edib. Futbolxeber.az-ın məlumatına görə, Amsterdam klubunun qələbəsində “Bayer”dən icarə əsasında heyətə qatılan Arkadiuş Milikin böyük rolu olub. 20 yaşlı forvard 6 dəfə rəqibi məyus edib. Milik 22, 26, 62, 82, 87 və 88-ci dəqiqələrdə rəqib qapısına yol tapıb.

Qeyd edək ki, bununla 20 yaşlı polşalı 2009-cu ildən sonra Hollandiyada bir oyunda 6 qol vuran ilk futbolçu olub. Sonuncu dəfə bu uğura həmin vaxt “Ayaks”da çıxış edən Luis Suarez imza atmışdı.