Paris-2024-də bu gün: Azərbaycanın daha bir medal ümidi tatamiyə çıxır

Paris-2024 Yay Olimpiya Oyunları davam edir. 

 

Futbolxeber.az saytının məlumatına görə, bu gün Azərbaycanın 2 idmançısı və 1 milli komandası mübarizə aparacaq.

 

Cüdo 

 

Cüdo 100 kq çəki dərəcəsində yer alan dünya və Avropa çempionumuz Zelim Kotsoyev 1/8 finalda Pyotr Kuçera (Polşa) - Tomas Briçeno (Çili) cütünün qalibi ilə qarşılaşacaq.

 

Cüdo yarışları saat 12:00-da başlayacaq. 

 

3x3 basketbol

 

Azərbaycanın qadınlardan ibarət 3x3 basketbol millisi bu gün 2 oyuna çıxacaq. Yığma Fransa ilə üz-üzə gələcək. Fransa millisi  dünya kuboku 2012 və dünya kuboku-2023-də 2-ci, dünya kuboku-2018 və dünya kuboku-2019-da 3-cü, dünya kuboku-2022-də isə 1-ci yerə çıxıb, 2018, 2019, 2022-ci illərdə keçirilən Avropa kubokunun isə qalibi olub. Görüşün 14:30-da başlaması nəzərdə tutulub.

 

Azərbaycanın qadınlardan ibarət 3x3 basketbol millisi növbəti oyununda isə Almaniya ilə qarşılaşacaq.  Almaniya millisi 2021-ci ildə keçirilən Avropa kubokunda 2-ci olub. Sözügedən matç 20:30-da başlayacaq.

 

Boks

 

92 kq çəkidə yarışan təmsilçimiz dünya çempionu, dünya 2-cisi, Avropa oyunları-2019-un qalibi, builki Avropa çempionatının bürünc mükafatçısı Alfonso Dominqes 1/4 finalda qazaxıstanlı Aybek Oralbayla münasibətlərinə aydınlıq gətirəcək. A.Oralbay 2018-ci ildə gənclərin Olimpiadasında  qızıl medal, 2018-ci ildə gənclərin dünya çempionatında gümüş medal qazanıb. Döyüşün 19:54-də başlaması nəzərdə tutulub.