“Xəzri” və “Neftçi”nin baş məşqçiləri dramatik oyunu şərh etdilər

“Xəzri” və “Neftçi”nin baş məşqçiləri Azərbaycan Basketbol Liqasının X turunun açılış oyununu şərh ediblər.

Futbolxeber.az saytının məlumatına görə, 86:84 hesablı qələbəyə sevinən “Xəzri”nin baş məşqçisi Murat Dikmən deyib:

“İlk növbədə gözəl oyuna görə rəqibi təbrik edirəm. Bayrama görə legionerlərimiz vətənlərinə yollanmışdılar. Bu səbəbdən də məşqləri tam heyətlə keçə bilmirdik. Paltardəyişmə otağında uşaqlara dedim ki, bizim öz sistemimiz, proqramımız var. Sadəcə oyunun tempini qaldırmaq lazım deyil. Üçüncü hissənin ortalarında “Neftçi” müdafiədə gücsüz təsir bağışlayarkən tempi qaldırdıq. Buna görə də rəqibdən 17 xal aralandıq. Lakin bu, arxayınçılığa səbəb oldu və yanlış qərarlar qəbul etməyə başladıq. Bundan yararlanan rəqib sona qədər mübarizə apardı. Matçın sonunda çox yorğun idik. Kamran Məmmədov ardıcıl 3 xallıq atışlar atırdı. Bütün bunlara baxmayaraq, istənilən halda vacib olan qələbədir. Qarşıdakı hələ 8 oyunumuz var. Ciddi səhvlərə yola verməsək, ilk üçlükdə, bəlkə də daha yüksək pillədə olacağımıza inanıram. Hədəfimiz mümkün olduğu qədər yaxşı yerdə qərarlaşmaqdır. Həm çempionatda, həm də kubokda. İnanıram ki, bunu bacaracağıq”.

“Neftçi”nin çalışdırıcısı Anar Sarıyev isə komandasının yenilgisini belə şərh edib: “Görüş çox maraqlı alındı. Bizim əsas problemimiz 14 top itkisi idi. Yüksək Liqa komandası üçün bu, çox böyük rəqəmdir. Rəqibi müdafiədə azlıqda yaxaladığımız epizodlarda ötürmələrin qeyri-dəqiqliyi ruh düşkünlüyünün əsas səbəbi idi. Kamran Məmmədov zədədən sonra cəmi 3 məşqdə iştirak edib və hələ ki formasını bərpa edə bilməyib. Maykl Karter isə hələ də zədəlidir. Yalnız 2-3 gündən sonra məşqlərə başlayacaq. Ceyms biletlə bağlı problem yaşadığına görə İngiltərədə yubandı. Ancaq bu səhər Bakıya çatdı. Buna baxmayaraq, məşq etmədən meydana çıxdı. Debütantımız Ulaşın müdafiədəki çıxışını bəyəndim. Matçın gedişində 17 xal fərqi ilə geri düşmüşdük. Uşaqlar sanki oynamaq istəmirdilər. Son 5 dəqiqədə qarşılaşmada geridönüş üçün pressinq tətbiq etdik. Bu, hardasa alındı. Lakin yenə də hücumda itkilərə yol verirdik. Son dəqiqərlərdə komandam bütün gücü ilə mübarizə apardı. Yekunda qalib də gələb bilərdik. Oyunçularla danışdım. Təslim olmaq fikrində deyilik. Qarşıdakı turlarda daha yaxşı oynamağa çalışacağıq. Əlimizdən gələni edəcəyik ki, azarkeşləri sevindirək”.