Valeriya Məmmədova: “Biz bunu bacardıq”

“Çox çətin görüş oldu. Türkiyəyə məğlubiyyətdən sonra tamaşaçıların etimadını qazanmaq çətin idi. Amma biz bunu bacardıq. Azarkeşlərə minnətdarlığımı bildirirəm ki, bizi tək qoymadılar”. Futbolxeber.az-ın məlumatına görə, bunu apasport.az saytına Azərbaycan millisinin voleybolçusu Valeriya Məmmədova (Korotenko) deyib.

Bakı-2015 I Avropa Oyunlarında mübarizəni davam etdirən qadınlardan ibarət yığmamız 1/4 final mərhələsində bu gün Hollandiya üzərində 3:0 hesablı qələbə qazanaraq, yarımfinala vəsiqə qazanıb.

Yığmamızın təcrübəli liberosu qrup mərhələsinin son matçında Türkiyəyə (0:3) məğlubiyyətə də münasibət bildirib: “Komandada bəzi problemlər var idi. Amma biz bunların həlli yolunda çalışdıq. Bu gün öz oyunumuzla göstərdik ki, problemlər yavaş-yavaş aradan qalxacaq. Azarkeşləri də gələn oyunumuza dəvət edirəm”.

Qeyd edək ki, milli komandamız yarımfinalda yenidən Türkiyə ilə qarşılaşacaq. Bu görüş iyunun 25-də baş tutacaq.