“Gimnastika, Avropa Oyunları: Bütün ulduzlar “Bakı-2015”də

Bir neçə gündən sonra Azərbaycan paytaxtında start götürəcək “Bakı-2015” birinci Avropa Oyunları dünya mətbuatının diqqət mərkəzindədir. Futbolxeber.az-ın “Azərtac”a istinadən verdiyi məlumata görə, İtaliyanın www.oasport.it saytında “Gimnastika, Avropa Oyunları: Bütün ulduzlar “Bakı-2015”-də” sərlövhəli məqalə yerləşdirilib.

Məqalədə qeyd edilib ki, iyunun 12-28-də Bakıda keçiriləcək ilk Avropa Oyunları idman tarixinin çox mühüm hadisəsidir. Bu mühüm yarışda idmanın digər növləri üzrə altı mindən artıq atlet, o cümlədən dünya səviyyəli gimnastlar medallar uğrunda mübarizə aparacaqlar. Gimnastika üzrə bütün idman tədbirlərinin favoriti olan Aliya Mustafina səkkiz aylıq fasilədən sonra nəhayət Bakıda böyük səhnəyə qayıdacaq.

Diqqətə çatdırılıb ki, son 3 ildə səhhətində baş vermiş problemləri arxada qoyan Viktoriya Komova da “Bakı-2015”-də çıxış edəcək. Bakıdakı tarixi idman tədbirinə hazırlaşanlar arasında Avropanın gimnastika kraliçası hesab edilən Culya Steinqruber, rumın Laura Jurka, İtaliya komandasının kapitanı Ciorciya Bell, polşalı məşhur idmançı Marta Pihan–Kulestza, alman Sofi Şeder və Elizabet Sayz da var.