İstanbulda “Bakı-2015”ə dəstək məqsədilə görüş keçirilib

İstanbulda “Bakı-2015” birinci Avropa Oyunlarına dəstək məqsədilə görüş keçirilib. Futbolxeber.az-ın “Azərtac”a istinadən verdiyi məlumata görə, Türk Dünyası Araşdırmalar Vəqfində Azərbaycanın İstanbuldakı baş konsulluğunun iştirakı ilə təşkil olunan görüşə Türkiyə Universitetləri Məzunları İctimai Birliyinin, Azərbaycan Jurnalist Qadınlar Assosiasiyasının, Bolqarıstan Türkləri Mədəniyyət Dərnəyinin, Ural Təhsil Mədəniyyəti və Strateji Araşdırmalar Dərnəyi və digər QHT-lərin təmsilçiləri və KİV nümayəndələri qatılıblar.

Görüşdə birinci Avropa Oyunlarına hazırlıq işlərinin vəziyyəti, bu beynəlxalq tədbirin əhəmiyyəti barədə məlumat verilib. İştirakçılara “Bakı-2015” haqqında əyani vəsaitlər təqdim edilib.

Çıxış edənlər Bakının birinci Avropa Oyunlarına ev sahibi etməsinin Azərbaycanın sürətli inkişafı ilə birbaşa əlaqəli olduğunu diqqətə çatdırıblar. Qeyd ediblər ki, bu mötəbər yarışın Bakıda keçirilməsi bütün türk dünyası tərəfindən böyük rəğbətlə qarşılanır.

Əminliklə qeyd olunub ki, Azərbaycan birinci Avropa Oyunlarını yüksək səviyyədə təşkil edərək dünyada idmanın inkişafına böyük töhfə verəcək.